ලෝක මව්වරුන්ගේ දිනයට සමගාමීව, කලුබෝවිල දකුණු කොළඹ ශික්ෂණ රෝහල විසින් සංවිධානය කළ, ˙මාතෘ සහේළී˙ වැඩසටහන මැයි මස 12 වන දින සිට ඇරඹුණු බව සාඩම්බරයෙන් දැනුම් දෙමු.
ශ්‍රී ලංකා ප්‍රසව හා නාරිවේද සංගමයේ සංකල්පයක් ලෙස සෞඛ්‍ය අමාත්‍යාංශයේ මඟපෙන්වීම යටතේ ක්‍රියාත්මක කරනු ලබන මෙම වැඩසටහනෙහි ප්‍රධානතම අරමුණ වන්නේ සාමාන්‍ය දරු උපතකදී ගර්භණී මවගේ සහායට කාන්තා ප්‍රසූත සහායිකාවකට ඇය අසල රැඳී සිටීමට අවශ්‍ය පහසුකම් සැලසීම මඟින්, දරු ප්‍රසූතිය මවට ධනාත්මක අත්දැකීමක් බවට පත් කිරීමයි. මෙහිදී මවට අවශ්‍ය මානසික සහනය ලබාදීම සහ දිරිගැන්වීම සඳහා තමා විසින් තෝරාගනු ලබන කාන්තාවකට ප්‍රසූත සහායිකාව ලෙස තමා අසල රැඳී සිටීමට අවස්ථාව සලසා දෙනු ලැබේ. මේ සඳහා තම මව, ළඟම ඥාතිවරියක්, යෙහෙළියක් තෝරා ගත හැකිය.
රෝගියාට සහනදායී නොවන රෝහල් ප්‍රතිපත්තීන් සහ අඩු පහසුකම් තත්ත්වයන් හේතු කොට ගෙන දරු ප්‍රසූතියේදී මව්වරුන්ට අත්දකින්නට සිදුවන මානසික පීඩාවන් සහ වේදනාකාරී අත්දැකීම් පිළිබඳව මැසිවිලි අපි අසා ඇත්තෙමු. මෙම වැඩසටහනේ අරමුණ වනුයේ ඔවුනට විස්වාසවන්ත සහායිකාවක සමග ප්‍රසූති අද්දැකීම බෙදා හදා ගනිමින් දිරිමත්ව සහ අන්‍යොන්‍ය අවබෝධයෙන් යුතුව සැහැල්ලු මනසකින් මෙම සොඳුරු අත්දැකීමට මුහුණ දීමට අවස්ථාව සලසා දීමයි.
